Joe Biden Bandaríkjaforseti og Donald Trump, fyrrverandi Bandaríkjaforseti, munu mætast í kappræðum sjónvarpsstöðvarinnar CNN þann 27. júní.
Venjulega eru forsetakappræður haldnar í september og október og verða þær því óvenju snemma. Kosningarnar sjálfar verða 5. nóvember.
Donald Trump hefur í dágóðan tíma skorað Joe Biden á hólm í kappræðum og nýlega sagði Biden í útvarpsþætti hjá Howard Stern að hann væri til í að mæta Donald Trump í kappræðum.
Í morgun birti Joe Biden myndband þar sem hann skoraði formlega á Trump að mæta sér í kappræðum og svaraði Trump kallinu um hæl á samfélagsmiðlum.
https://www.mbl.is/frettir/erlent/2024/04/26/biden_svarar_kalli_trumps/
https://www.mbl.is/frettir/erlent/2024/05/15/myndskeid_biden_skorar_a_trump/
Engir áhorfendur
Í umfjöllun CNN kemur fram að kappræðurnar verði haldnar án áhorfenda sem hefur ekki gerst síðan þeir John F. Kennedy og Richard Nixon mættust í kappræðum fyrir forsetakosningarnar árið 1976.
Það voru einnig fyrstu forsetakappræðurnar sem sjónvarpað var.
Kosningateymi Joe Biden hefur lagt til að haldnar verði tvær kappræður, í júní og í september. Trump sagði á samfélagsmiðlum í dag að hann væri til í enn fleiri kappræður en framboðsteymi beggja manna hafa á undanförnum vikum rætt sín á milli um hvenær kappræðurnar ættu að vera haldnar.
Tímasetningin hefur vakið athygli en útskýrist meðal annars af því að mun fleiri kjósa nú snemma utan kjörfundar en tíðkast hefur áður.